© by Herta Koroschetz

Wos die Zukunft wohl bringt

Wider is es August, i sitz vor mein Haus.
Mein Gott, wia schaut´s do heite aus!
Koa Blattl am Bam, verdürrt is des Gros.
Wos is mit da Wölt eigentlich los?
Ollas vaschiabt se auf dieser Erd´n.
Wias früher woa, so wird´s nimma werd´n.
Oes Kinda san mia über grüne Wies´n g´rennt,
hot sich so noch den Summa g´sehnt.
Dürre hot ma nua vom Urlaub kennt,
wost schnö über´n Saund, zum Meer hin bist g´rennt.
Heute san bei uns tropische Nächte dahoam.
Do brauchst nimma in den Süden foahr´n.

Doch plötzlich schlogt des Wetter um
und Hagel und Sturm haut di fost um.
Jetzt regnet´s wieda, wos oba geht,
dass da Boch und da Fluß über geht.
I woas net, wos de Zukunft nu bringt;
Woas nua, dass des Wetter aufhoet´n keinem gelingt.
Warum des so is,
des frogt ma se g´wiß.
I woas nua, dass ma irgendwia damit z´recht kemma muaß.
Mit da Hitzte, dem Reg´n, es is a Buaß´.
Mitunter kaunn ma wirklich versteh´,
waunn de Leut´ sog´n: Früher woas sche!