© by Katharina Tröstl
Koa Leichtn in de Augn
Des Leichtn in ihre Augn duat vablossn,
sie fühlt si alloan und im Stich lossn.
Zweng Rücksicht nehman maunche Leit,
in dera fia uns olle außergewöhnlichn Zeit.
Fost so, ois obs vagessn haum,
dass ma ohne unsre Vakäufer nix mehr kaufn kaun.
Im Gschäft rennan sies nieda,
unfreindlich san maunche und zwida.
Laungsaum wirds fia sie a Plog,
sie duat jo eh den gaunzn Tog.
Sie woaß, dass es neamt bes‘ mant, doch daun
gspiat sie, dass sie nimma kaun.
Zum Schutz ihra Liabstn bleibats gern daham,
mit dem Wunsch is sie bestimmt net allan.
So vü Leit, de fia uns olle funktioniern,
orweitn gehn und eana Gsundheit riskiern.
So helf ma doch zaum in unsan Laund –
und nehma a bissal Rücksicht aufanaund.