© by Christiana Zöchling

Gaunz frira hot mei Oma imma für die vüln Leit am Hof des Brot bocha. In an rießign Bochofn. Üwa des, wia sie des gmocht hot, hob i scho amoi gschriebm. I hob dabei owa wos Wesentliches vagessn. Jeds Moi hot sie a weng an Toag wegglegt und vo dem san daun Braundfleckn fia uns Kinda gmocht woan. Des woa fia uns a Festtog.

Sie hot a Stickl Toag owa gschnittn, ausgwoichn undd daun am Kuchlofn direkt auf de Headplottn glegt. Fia a poa Minutn mit etla Moi umdrahn. Fertig woa de Köstlichkeit. Mit an Löffe a Schmoiz drauf vateut und gsoizn. Ma woa des guat. Do haum mia uns augstöt, weu hia und do is si a zweita Fleck a nu ausgaungan.