© by Elisabeth Halbmayr
Batschalspurn
Batschalspurn im Schnee,
maunchmoi duats nu weh.
Batschalspurn auf Tisch und Baunk
hob i imma dir vadaunkt.
Batschalspurn aun da Tir,
mei wos hob i gschimpft mit dir.
Batschalspurn am Wirschtltölla.
I wor schnö, doch du worst schnölla.
Batschalspurn aum Bett,
kuschln mit dir wor nett.
Batschalspurn aum Gwaund
dei Batschal in meina Haund.
Batschalspurn am Bodn volla Erd,
i hob putzt und du host gschert.
Batschalspurn Tog und Nocht,
uman Schlof host mi oft brocht.
Batschalspurn, de san vaschwundn,
i hob di oafoch nimma gfundn.
Batschalspurn do und durt.
Wo bist du, warum bist du furt?
Batschalspurn de schmerzn
san fir imma in mein Herzn.
Batschalspurn san imma doda,
i vamiss di, varruckta Koda.