© by Elisabeth Halbmayr

Baunkind

Groß woan, oas-siemasechzg,
bin i, und des woa ned schlecht,
auf an Bauanhof im Grean,
duat woa vü Muh zan Hean.
Und so vü zan seng,
des hob i gern meng,
auf Entdeckungsreise geh,
auf da Droadbonloata steh,
auffigräun und – Miau!
Schau si des moi oana au,
do woan ba de Stohbinkl im Eck
hibei kloane Katzl vasteckt!
Des woa a schens Platzl,
jedn Tog kuschln mit de Katzl.
Oda Radlfoan ums Haus,
durch de Wiesn mit Gebraus!
Oamoi bin i in hochn Bogn
voigas in de Brennessln gflogn.
Oamoi hädi ban Owakuma
van Heibon fost de Stiang midgnuma.
Und wos a gaunz supa woa,
stö si des moi oana voa,
is wia ma Dreschn woan,
midn Mähdrescha midfoan.
Und is’s Auto moi ned gfoan
bin i midn Trakta oghoid woan
wia de Resi in dem Liad,
de wos midn Trakta oghoid wiad.
Nia häd mei Kindheid aundas sei soin,
nia häd i mid wem aundan tauschn woin.