Bubeninternat

Im Internat der Buben
is da schlimmste Kerl da Ruben.
Aun zweiter Stö kimd glei da Maxl,
weu der legt an jedn s Haxl.

Dann is do nu der Gunter,
Tog und Nocht is der munter.
Owa laung nix gegnan Paul
mit sein großn, frechn Maul.

Dann gibt’s a boa so wüde Hund,
oin vorau da Sigismund,
mit sein Kameradn,
dem Hias, dem überdrahdn.

De verhaun den braven Eduard,
solaung bis erm olles wehduad,
und in jeder Paus’
verdreschns den oama Klaus.

Probleme gibt’s a mitn Beda,
der kimd zum Frühstück öwei späda.
Nu ärger is’ midn Sigismund.
der kimd glei z’spod in jede Stund!

Vagessn derf ma net in Jochn,
weu der tut jo so brav kochn.
Sei oama Kamerad da Jürgen
muas den Fraß dann owi würgen.

Dann is da nu der Veit,
der is so super gscheit.
Drum schreibt er a fürn Leo
de Hausübung in Geo.

Vor jedm Test is da Kurt
entweda graung oda furt.
oba fürn Max
san Tests a Klax.

Jedoch da Oanzige, wos lernt,
is a Streber namens Bernd.
Trotzdem is er immer Zweiter
hinterm Max, dem Spitznreiter.

Da Ablauf vo a so an Test
steht in da Klass öwei scho fest.
Nix gschiacht bevor da Poit
sein supa Schummler ausahoit.

Da Tom, da Fritzi und da Kai
san ban Oschreim vorn dabei
Und so gehds an jedn Dog duat zua,
de Buama, de gem nia a Rua.