© by Elisabeth Halbmyr
Da Oma ihr neicha Computer
Himmi Herrgott, Sakra Haxn
Jetzt hamma a Computer-Kraxn.
De Enkerl ham brav an uns denkt
Und uns so a Klumpad gschenkt.
Owa des is ollalei,
wie schoit ma de Hurnskraxn ei?
Find ma endli daun den Knopf
Hamma s Passwort ned im Kopf.
Cod eigem – des kannst schmeißn,
wie soi i’n aufn Computer scheißn?
Sömmi soi mei Kennwort sei.
Oiso gib i Sömmi ei.
Nicht erkannt schreibt ma des Trum.
Herst i glaub i haus glei um!
Großbuagstabn und a Zoi
Wü des Trum, es is a Quoi.
I schreib Sömmi mit großm S
Und an Oasa, nur kann Stress.
Owa, Himmi Kruzi fix,
es riat si jo scho wieda nix!
Passwort zu kurz.
Wos soi der Furz?
Sömmi Oas Furz tipp i mit Wut
Owa des is a net gut.
Himmi Orsch i glaub i spinn,
Kennwort ergibt keinen Sinn!
Sömmi Oas Himmizefix
Nimmstas hiaz, oda nimmst nix?
Na, zan Deifi, es föd a Zeichn.
Heast, muas des Gaunze ned boid reichn?
Semmi Oas Himmikruzifix Beistrich
Nimms hiaz, oder i zerfleisch dich!!
Es föd a Zeichn und Kennwort z laung
Den Schas griag i heit nimma in Gaung.
Semmi Oas Plus Himmikruzifix
Und es geht scho wieda nix.
Zu unsicha is des Wort
Und i tipp in einem fort
Himmiorschzefix Oas es bumpat
Mei Comuter is a Klumpat
Sakrahaxn Oas Hurnskrippi
Wia a narrischa Deifi tipp i.
Des Kennwort, na des derf i ned nehma,
weu, wie soids a aunders kema,
dieses Wort scho existiert.
I schoit aus und geh zum Wirt.
Jetzt brauch i an Schnops und a gscheits Bier,
weu i den Scheiß hoit ned kapier.
Nie wieder schoit is ei de Kraxn,
Himmizefix und Sakra Haxn!