© by Elisabeth Halbmayr
A bissl a aundare Liebeserklärung
I woas, des mog hiaz komisch sei,
mid Mauna foa i e nur ei.
Owa mid dia, do foa i ned schlecht.
Dawei nur im Tram, und nu ned in Echt.
Owa mit dir do foa i im Tram
durch de Wöd und nia geng an Bam.
Obwoi i jo in Echt
ned guad foan kau, sondan schlecht,
foa i jede Nocht mit dir durch de Stroßn,
kau de Händ ned vo dein Lenkradl lossn,
Musi laut und Fensta auf,
jo im Tram bin i mit dir guad drauf.
I drah meine Rundn mit dir durch de Wöd,
spendier fir dein Benzin a mei gaunzes Göd.
Aum Dog häng i dem Tram nu noch,
denk aun dei schenes Schiebedoch
und aun dein Lack in Anthrazit,
i sog da wos, du bist a Hit!
Normalaweis mog i van Putzn nix hern,
owa di putzad und pflegad i gern.
Und waun i togs zan Bauhnhof geh,
siach i di a jeds Moi steh
aufn Parkplotz voa da Dia,
und irgendwaun, do gherst du mir.
Hiaz woast amoi, das i auf di steh,
du coola oida Siema-BMW!