© by Herta Koroschetz
IN DA WOARTESCHLAUNGA
Im Supermoarkt, des is famos,
do is heit da Teufl los.
Zu gewinnen gibt es wos für Groß und Klein,
bitte Leute tretet´s ein.
Von neun bis zwölf rückt a des Fernseh´n aun,
wos ma in „Österreich heute“, Abend´s, daunn bewundern kaunn.
Der Jenige, der des Meiste kaft,
hot den Hauptgewinn daunn g´schafft.
Haufenweise san de Leut hing´foahrn
weil´s auf den ersten Preis gaunz narrisch woarn.
Einkauft haum olle, wia net bled.
Is kloa, dass do beim Z´oehn nix weita geht.
Es dauert a net laung,
do bildet sich a große Woarteschlaung´.
A jeder gaunz argwöhnisch schaut,
wos der vor eam so in sei Wagerl haut.
Schließlich soll seins jo mehr sein, oes beim aunder´n Maunn,
waunn er a des Dahoam net braucha kaunn.
So vergeht a guate Stund
wo ma koan Schritt vom Fleck weg kummt.
De Kassierinnen können goar nimma recht sitz´n
und kumman mächtig scho in´s Schwitz´n.
Noch da Kassa steht vom Fernseh´n da Kameramaunn,
damit er oes schön filmen kaunn.
De Woarteschlaunga wird imma länga
und de Ungeduld tuat a zuanehma.
„Geht do nix weita“? schreit a Maunn.
„I stöll mi scho seit zwoa Stunden aun!
Tan leicht de Weiber do vor´n a Kaffeetratscherl obhoet´n?
Und können de net nu a Kassa einschoet´n“?
Do draht sich a Frau um zu eam
und sogt: “I glaub, i tua net richtig hör´n!
Wos hast do Weiber, se Valott,
jetzt entschuldigen se sich, oba flott“!
„I denk jo goarnet d´rau“,
sogt jetzta d´rauf da Mau.
„Oba, des Gaunze hot jo eh koan Zweck.
De bringt ihr´n Arsch jo net vom Fleck“.
„Jo des is jo unerhört“!
Ruft a Zweite jetzt empört.
Ma kaunn sog´n wos ma wü,
oba des woa dera Frau jetzt z´vü.
Sie nimmt a Packerl Milch zur Haund
und leert´s Demjenigen auf´s G´waund.
Der schnoppt, gaunz außer sich, noch Luft,
weil des verbreitet net grod an guaten Duft.
„Se Wahnsinnige“!“, schreit er zu ihr.
„Jo wia kumman ma se via?
Wia deppert muaß ma denn do sei?
Sie zoehn ma jetzt de Putzerei“!
„Des zohl i ger´n“, sogt sie jetzt d´rauf.
„Hauptsoch, se hör´n zum Sudern auf“.
Des is wieda a Gaudi für den Kameramaunn,
der goarnet so schnö filmen kaunn.
A poar Wagerl hinter dem Suderant´n steht a Dame,
de fackelt jetzta a net lange.
Sie nimmt a Packerl Möh´
und schüttet´s Diesem über sei milchgetränktes G´wandl schnö.
Jetzt is mit dem seiner Geduld endgültig vorbei
und scho gibt´s de schönste Rauferei.
Da Fernsehmaunn hot direkt an Streß beim Filme produzier´n,
weil de Packal nur so durch de Lüfte fliag´n.
Inzwisch´n haum de Vorderen de Polizei aungruaf´a,
de jetzt zum Schlicht´n tan versuacha.
Etliche Festnahmen hot´s geb´n, bei Oet und Jung,
wegen Sachbeschädigung und Beamtenbeleidigung.
Wer den ersten Preis hot gmocht,
haum´s bei „Österreich heute“, goarnet brocht.
Nur g´sogt is woar´n, so nebenbei,
dass in an Supermoarkt, in da Woarteschlaunga a Rauferei entstaunden sei.