© by Maria Gansch

Warteschlange

 Bei der grean Tir stengan drei Leit, wos tan de durt. I fohr jeden Tog a pormol do vorbei, ober do is nu nia wer gstandn. Hiazt for i eikafa, wonn i zruckkimm, schau i, wos do los is. Eigentlich hob i nu ins Café schaun wolln, ob die Liesi und Gerti drinn san, oba i bin jetzt neigieri, wos de drei Leit ba dera Tir wolln.

Noch dem Essen stöll i mi dazua, wonn i vorher nit woaß, wos do los is.

Wia i vorbei gfohrn bin, san a por mehr durt gstondn. Ober de Moslemfrau wor nimmer dabei. De ondern san a so komisch onzogn. Mords große Sunnbrün, a Kappl mit an Schirm, des über d`Nosn obaglengt und a Holstiachl. Kenna tua i neamd. Überhaupt, wo hobn de eane Auto stehn? I tat schon gern wissen, von wo de her san. Bei der nächsten Gossn wor do de oiti Greißlerei, do is a kloaner Parkplotz.

Irgendwo miaßn de Leit do hin. Bei dera Tir kimmt koaner außa. Do gengan nur Leit eini und des gonz longsom. Außa kummt überhaupt neamd.

Bevor i eikaffa for, schau i ban Parkplotz vorbei. I mecht wirkli gern wissn, wos des soll.

Hiazt bin i do hintn auf dem laren Fleck, sunst steht do allweil vüll Klumpert umadum. Ois is schen weggramt. A Menge Auto stengan do mit Nummerataferl aus an ondern Bezirk. Große schene Wägen mit vül PS und kloane Rostlauben dazwischen. Sogor a Taxi aus der Hauptstodt steht dabei. Durt und do sitzt wer im Auto und wort auf irgendwos. Do ba de Staudn steht wer und zuzelt ba oana Dosn. Ob I den amol frog, wos des Gonze soll. Hoffentlich haut er de lare Dosn nit wieder in´d Stauna eini. Hiatzt, wos so schen zomgramt is.

I glaub, der kennt si a net recht aus. Er schaut umadum und tuat so, als wann er wos suachat. I sog eam, das des nächste öffentliche drei Stroßn weider bei da Gemeinde is. Zerscht schaut er mi gonz verdutzt on, donn fongt er zan lochn on. Na, i frog mi nur, wos i do eigentlich soll. Des woaßt du a nit? I hob glaubt, du woaßt, warum du so weit herfohrst. Host nix derhert? De zwoa, wos i hergfiert hob, hobn ganz leise gred, daß eana dahoam z`fad is, des dauernde Testn is anet lusti. Ober impfen wolln si si a nit lossn, do fohrt d´Eisenbahn drüber. Ober i moan, des hoit eh kaner aus. Wirst segn, de wos gimpft san, miaßn olli sterbn. Wia long bleim die ondern über?

Auf oamol kimmt oaner gonz glickli aus de Staudn außa, in der Hond holt er an kloan Zettl. Aus oan Auto steigt oana aus, mit Sunnbrünn und Kappl, und geht gonz longsom de Gossn obi und biagt umi. Es braucht jo koaner wissen, das er impfn woa. Er gfreit si so, das er wieder furtgehn derf.