© by Margit Lashofer

Nette Leit gibt’s goar vü,
do kaunn ma sein, wo ma wü! 

D´ Leit woatn auf guate und ehrliche Gedaunka,
und so wird ma a üwaroi guat empfaunga! 

So wia ma zuageht auf d´ Leit,
so kimmt´s a z´ruck zu jeda Zeit! 

Ma braucht sich nua söwa bemühn,
und söwa an guatn Wülln! 

Ehrlich und echt sein, des is wichtig,
net vastölln, des is richtig! 

So kimmt a jedes Wort guat au,
mehr braucht ma net dazua toa! 

Ma braucht nua zugeh auf d` Leit,
do san daunn schene Gespräche nimma weit! 

Egal ob im Zug, im Gschäft oda auf da Stroßn,
ma kaunn es oft söwa net fossn, 

wia sich do oft liabe Gespräche ergebn,
do kaunn ma vü schene Sochan dalebn! 

Ma braucht nur ´s Herz aufmocha,
und es is dabei a oft zan Locha! 

Es san net olle Leit schlecht und bös,
es mocht net a jeda glei a Gedös! 

Untahoitn mitanaund des is so schen,
um des tuats im Leben wohl gehn! 

Ma kaunn va an jedn wos lerna, waunn ma nur wü,
so is des Leben, des is a schens Zü! 

I g´frei mi, waunn i kennalern neiche Leit,
und nimm ma do a dazua de Zeit! 

Do wird hoit daunn trotscht und philosophiert,
und üba des Lebn a wenig nochsinniert. 

G´locht wird  oft a dabei,
so geht`s Leben net aun an vorbei! 

Ma muass hoit a guate Einstellung hobm,
und a den Herrgott bittn, do obm! 

Daunn trifft ma auf lauta nette Leit,
und ban Gedaunkn-Austauschn vageht so schnö de Zeit! 

De Zeit muass ma se nemma, des is gwiss,
weil sunst des Leben sauwa leer is!

(Aus dem Buch „Es gibt immer einen Weg“)