© by Elisabeth Halbmayr
Wos so a Haund olles ausdruckn kau
De Haund kau frogn,
griaß di, kennst mi nu?
hallo, wer bist du?
lang hamma uns ned gsehn,
i frog mi wos is gschehn?
De Haund kau frogn,
sein ma Freind?
sein ma nimmer Feind?
sein ma wieder guat?
wei Streitn wehtuat.
De Haund kau sogn,
es tuat ma load,
wor ned so gmoad.
Kum, verzeih,
und schlog ei.
De Haund kau bittn,
bitte ned geh,
loss mi ned do steh,
bleib bei mir,
is so einsam ohne dir.
De Haund kann sogn,
schlog ei, wir hams gschofft
oda hoit mi, i hob ka Kroft
oda loss mi in Rua,
winke-winke, i hob gnua.
De Haund kau rufn,
ois Guate, i gratulier!
oda hallo, wie geht’s dir?
oda pfiat di,
Gott behüat di.
De Haund kau meinen,
i fühl mit dir,
wanni beim Begräbnis kondolier,
i gib da Trost und Hoit,
und hoff es geht dir besser boid.
De Haund kau
Bittn, Dankn, Pfiatn und griaßn,
Festhoitn, Auslossn, Freindschoftn schliaßn,
Bekanntschoft mochn, gratuliern,
verobschiedn und kondoliern.