© by Elisabeth Halbmayr

Eikafa mid an Hunga

Gehst eikafa mid an Hunga,
hod da Hunga a scho gwunga.

Wüst aweng a Üwagwicht
mit Diät bekämpfa und Vazicht,
daun muast ban Eikafageh
da Vasuchung widasteh.

So weid, so guad, es is scho spod.
Auf da Listn sted Salod.
Owa da Hunga
hod di bezwunga.

A Salodhappi wa’s gwesn,
owa du host Schoklad glesn.
Damid hods augfaungd und’s nimmt koa End
– und za da Eistrucha bist du grennd.

Auf da Listn sted Minaräu,
owa du denkst da nur: wäu.
Zwoa große Colafloschn
laundn in da Einkaufstoschn.

Kex und a Bier und prost,
scheiß auf eiweißreiche Kost,
auf Nuss und Linsn und auf Gmias,
weu du hostas liawa siaß.

Kerndlfuada bleibt a im Regal
und es is da voi egal,
das Zuckal und a Guglhupfal
in dei Einkaufswagl hupfan.

Nexts moi gehst hoid ohne Hunga
eikafa, daun host DU gwunga.