© by Elisabeth Halbmayr
Einkaufslistn
I muas fia nexte Wocha
heid in Einkauf mocha
und a Listn schreim mit Socha,
wos i brauch zan Kocha und Bocha.
A Mö, a Mü, an Zuga und Oa…
owa i woas gaunz sicha, do woa…
nu wos, des deaf i ned vagessn.
Ajo, a Brod zan Omdessn.
Fia Zmidog Nudln oda an Reis
und fia naumidog a Eis.
A Dofi Schoklad und Gummibärli,
gnua Noscharei hiaz, owa ehrli.
Hob i hiazad scho de Oa?
Heislpapia wiad a scho goa.
Daun brauch i nu Schneizdiachl
und a neix Kochbiachl.
Ajo und a Happi Salod,
wauns Gschäft grod an frischn hod.
Erdöpfi, Boradeisa und an Paschtinak
und a Soim brauch i fias Gnack.
Und mein Gutschein kau i nutzn
fia an Glosreiniga zan Putzn.
A Zaunpasta, de brauch i a
und an Essig, der is laa.
I suach und suach, und wia a Noa,
Hergod nuamoi, wo san de Oa?
Wos sted do, deaf i ned vagessn?
Kruzifix, i kaus ned lesn!
De Listn foid ma aus da Haund.
So a Muadsdrum Duachanaund!
Im Gschäft bi i hoid voi aum Saund.
Ren nua deppad umanaund.