© Christiana Zöchling
Laungsaum wiads zach. Jetzt lieg i scho fast a Wochn mit meine Freind in dera Kistn, eng an eng und koana schaut uns aun. Na, des stimmt ned. Zletzt hat mi oane aussa gnumma und aungschaut. Wias doun auf dem Schüd vor meina Kistn gsegn hot, dass i aus Spanien bin, hots mi foin lossn, wie a hoaße kartoffe.
A poar Schwestan von mia wean scho matschig. Oane hot scho a gschimpelte Stö. Koa Auhnung wos los is. Koana wü uns mea. Dawei schaun mia aus, wia olle aundan. Nua wie duat Bio drauf steht? Jetzt frog i mi, wos wiad aus uns wean, waun uns koana kaft. Fia´s Ketschup is a z´spot. Do wiad uns nua mea de Biotonne bleiben, obwoi mia eben goa ned Bio san.