© by Herta Koroschetz

Spuren der Vergangenheit

Waunn i in des G´sicht von an oeten Mensch´n schau,
daunn siach i oans gaunz genau:
Hoart woa sein Leb´n
und vü schware Orbeit hot´s geb´n.
Seine Hände san grob und haum von jung auf zuapocka miaß´n.
Koana hot g´fogt, ob´s di tuat vadriaß´n.
I hob eam oft zuag´hört waunn er von Früher hot erzöhlt,
von der so schweren ,doch schönen Wölt.
Maschinen woarn a Luxus und hot net jeda g´hobt,
oba ma hot´s net aunders kennt und ma hot a net g´frogt.
De Nochboarn san kemma waunn´s zum Dresch´n woa
und umgekehrt hot ma a g´holfa, des woa jo kloa.
Am Obend, noch den Ess´n,
is ma g´müatlich nu beinaunda g´sess´n.
Oft hot ma g´sunga und hot se g´freut,
daß de Oarbeit so guat gaungan is heut.
De Mensch´n haum net vü g´hobt und woarn doch so reich
waunn i des mit heute vergleich.
Domoes hot se oana auf den aundern verloss´n kinna,
heut kennt ma fost den eigenen Nochboar nimma.
A jeder is stressig und hot koa Zeit,
weil singa und zaumsitz´n heut goarkoan mehr g´feit.

Wieda siach i vor mia des oete G´sicht mit Foet´n und Fuach´n
und tua mi in eam einiz´denka versuach´n.
Mia fluach´n waunn unsa Computer net geht,
waunn des Auto scho wieda steht.
Waunn de Batterie justamend den Geist aufgibt
wo ma des Videospü grod so liebt.
Waunn uns s´Kreuz weh tuat vor lauter hock´n,

mia des Fernseh´n nimmamehr dapock´n.
Daunn frog i mi: wos denkt DER Mensch von uns blos?
Der Gedaunke loßt mi daunn net los.
Über wos zermartern mia uns s´Hirn?
Tan mia uns überhaupt nu g´spürn?
Wos hot des oete Leut in seinen Joahr´n mitgmocht?
Und trotzdem hot er imma wieder g´locht.
Mit Kloanigkeit´n hot so a Mensch a Freud,
wost schenk´n sollst, woast jo goarnimma heut.

De oete Generation, de do vor mia sitzt,
hot in seinem Leb´n nu nia Botox g´spritzt.
Der wa a nia in den Sinn kumma,
ma hätt´ sich vielleicht a Freundin g´numma.
Der hätt´a nia Haus und Hof verloss´n,
oder den Partner g´setzt auf d ´Stroß´n.
Na, leicht is nix in seinem Leb´n g´wes´n,
des kaunnst aun seinen Zügen les´n.
Ma is net wegen jeden Schmorrn glei ausanauda grennt,
hot ma sich a maunchmoe danoch g´sehnt.
Jeda woa z´fried´n, ma is mitanaunda oet woar´n
und ma hot g´wußt, ma is net alloan.

Heit zu Tog,
wo a jeda sein eigenes Einkommen hot,
vergißt ma oft, dass an Mensch´n gibt,
der a di von Herzen liebt.
I wünsch ma nur für mein eigenes Leb´n,
so an Mensch´n tuats für mi a imma geb´n.