© by Herta Koroschetz
I bin a Grenzstoa
I bin net schön und hob koan Glaunz.
Maunchmoe übersiacht ma mi gaunz.
I steh do, zwisch´n Wiesn und Ockaroa,
verloss´n, vergess´n, gaunz alloa.
Oes junger Spund san vü Leut um mi g´wesn.
Haum g´redet und d´eutet und von an Plan obag´lesn.
Daunn haum´s beschloss´n, i was des nu g´wiss,
dass do da richtige Plotz für mi is.
Mit Schaufe und Spot´n haum´s a Loch für mi g´mocht
und mi in richtige Position daunn brocht.
Des ollas is scho so launge her,
maunch oana, der kennt mi heut gor nimma mehr.
Mei Wetterseit´n is mit Moos bedeckt.
A sunst bin i gaunz schön verdreckt.
Des Gros wochst büschlweise um mi herum.
Beochtung kriag i koane, i frog mi warum.
I glaub den Leuten is gor net kloa,
dass mei Dosein wichtig is und woa.
Oes Zeuge steh i do stumm
und mahnend in da Gegend herum.
Mi siacht ma hoet net scho von weit`n.
I tua nur oes Grenzstoa mei Dosein bestreit´n.