© by Gaby Eder
A guada Kauf
Unsa Kotz – des is a Luada,
haglich is beim Kotznfuada!
Wauns beste Pappal vor ihr stehd,
do schnofeds nua, schaud weg und gehd.
Eftas kumd zu uns a Koda
a Strawanza hoid – a roda.
Den kaun i histöhn wos i wü,
den schmeckt ollas, nix is zfü.
Vom Raund schleckta dGlasur fost o.
Schlankl, sog i, s Tölla loss do!
Wos d Madam vaschmähd, frisst er.
Sie pfaucht nua, gibt eam sunst ka Ghea.
I ärgat mi sovü mid ihr,
nua Spompanaaln mochts mid mia!
Heit stehts vorm Fressn – i wass eh:
Es passt ned, s Hühnchen in Schelee!!
Na, wegghaut wiad nix, denk i mia,
i gibs hoid in a Tappagschia
in Kühschraunk mid an Deckl drauf
und hebs fian rodn Koda auf.
Späda sog i zu mein Mau:
„Jetzt wa a glane Jausn drau!“
„I hob scho gjausnd“, sogt a drauf.
„Des Suiz, des woa a guada Kauf!
A wengl gsoizn häds no ghead,
des hod mi weidas ned recht gstead,
nua schod, fia eich is nix mehr do!“
I seifz und man: „Do bin i froh!“
Unsa Bua steht do und locht:
„Des häd ma eh ned owebrochd!“
I schlog dHänd zaum: „Unsa Voda,
der frisst ollas – wia da Koda!“