© by Herta Koroschetz
AUFRUAH IN DA STODT
(DIE BREMER STADTMUSIKANTEN)
A Esl, a Hund, a Kotz und a Hauhn,
haum auf´n Bauernhof nimma vü taun.
Da Bauer hot deswegen beschloss´n,
de vier Viecha g´hörn daschoss´n.
De Betroffenen haum des durchschaut
un d san schleunigst von dem Hof obg´haut.
Nochdem´s den gaunzen Tog scho umanaund san g´rennt,
haum se sich noch an Ess´n g´sehnt.
Jetzt wos Woarmes in den Mog´n
könnt´a jeder leicht vertrog´n.
Doch wia kummt ma zu oana Esserei?
Koana von de Vier hot a Göld dabei.
So haum se se in da Stodt zu oana Stroßneck´n stellt.
Waunn wer vorbeigrennt is, hot da Hund daunn bellt.
Daschreckt is daunn a jeder Maunn
und hätt´sich fost in´d Hos´n taun.
Da Esl hot jetzt a recht g´schrian,
des tuat de Leut scho sakrisch stian.
„Gebt´s den Viechern wos zum Fressn.
De Blazerei kaunnst jo vergessn!
Waunn´s wos zum Kauen haum, geb´ns a Ruah,
oba gebt´s eana a g´nua
sunst faungan´s glei wieda au zum blär´n,
bis zum Hauptplotz kaunn mas hör´n!“
Des geht jo prima, denken sich de Viecha.
Des moch ma jetzt imma so, gaunz sicha.
Normal kaunnst an jeder Eck´n
Jo nur Rumänen sunst entdeck´n.
Do is unsa Gesaung direkt famos
und in da Stodt endlich wos los.
Beim nächsten Stroßnkonzert
haum´s daunn scho Vierstimmig blärt.
De Leut san glei mit Milch, Heu und Wurst aunkumma
und oana hots daunn sogoa mit hoam g´numma.
Des woa a gaunz a guate Soch.
Jetzt haum´s a übern Kopf a Doch.
Der Maunn hot daunn dressiert de müden Leiber
und woa da beste Geldeintreiber.
Olle Vier hot er daunn aufanaunda g´setzt
und is mit eana in de Stodt nei g´hetzt.
Bis zum Hauptplotz hot er´s g´fiaht
und woa spaunnt, ob des wos wird.
Do is a Reisegruppe mit Japana kumma.
De hot de Gruppe in Beschlog glei gnumma.
Fotografiert haum de wia blöd
und da Maunn hot´s Göld daneb´n zöhlt.
Für jedes Foto hot er an Euro kriagt.
Er kaunn net glaum, dass ma so leicht reich wird.
De Moral von der Geschicht´,
verurteil oete Tiere nicht.
Mit oete Sochn tuast oft mehr erreich´n,
wo Neues dir net amoe kaunn s´Wossa reich´n.