© by Elisabeth Halbmayr

Da Fux woas ned

Es woa amoi a schlaua Fux,
fir den wor jednTog a Jux,
glebt hoda in an Märchenwoid,
hundad Joa wora scho oid.
Da Fux wor brav, nia hoda gstoin,
und do haums eam wos auhänga woin.

Aun an Saumsta hods augfaunga,
do is da Jaga in Woid gaunga,
weu: Da Baua Hauns
suacht seid gestan sei Gauns!
Fux, de host du sicha gstoin,
und da Hauns wird zruck sie woin!
Oiso bessa gibstas her,
weu i hob a großes Gwehr!

Drauf hod da Fux gsogt: He!
I woa des ned, vadaumt, oke?!
Wos soid denn i mim Baua Hauns
seina schiachn, zachn, Gauns?
I hob den Woid nu nia valossn.
Frog amoi den Woif, den großn!
Mid dem bin i gestan gsessn
und mia haum a Festmoi gfressn.
Owa oans sog i da glei,
a Gauns, de woa do ned dabei!

Da Jaga frogt in großn Woif,
der spüd do grod a Runde Goif
mid an Hosn und an Fasau,
wo da Fasau des goa ned kau.
Zan Jaga songs owa ole drei,
da Fux woa gestan ban Festmoi dabei.
Ole haum gfressn und haum gsoffa.
Owa a Gauns hod koana troffa.

Da Jaga is sche laungsaum vazweufid
weu eam da Hauns gaunz sicha vateufid,
waunas ned boid fint, de blede Gauns
oda den, ders eam gstoin hod, in Hauns.
Auf oamoi hoda glaubt er wird a Noa,
is d’Gauns vabeigrend mit an Gschroa,
auf Roischuach zum Ausflug mocha
is des Viech dahoam ausbrocha!

Da Jaga schnappt de blede Gauns
und bringts wieda zruck zan Hauns.
Da Fux woas ned, des hoda jo gsogt
und da Jaga hodn nie wieda gjogt.